Ballade villon du concours de blois - Ballade

Je meurs de seuf auprès de la fontaine,
Chault comme feu, et tremble dent a dent,
En mon pais suis en terre loingtaine;
Lez ung brasier frissonne tout ardent;
Nu comme ung ver, vestu en président,
Je ris en pleurs et attens sans espoir;
Confort reprens en triste desespoir ;
Je m'esjouys et n'ay plaisir aucun;
Puissant je suis sans force et sans povoir,



Bien recueully, débouté de chascun.

Rien ne m'est seur que la chose incertaine

Obscur, fors ce qui est tout évident;

Doubte ne fais, fors en chose certaine ;

Science tiens a soudain accident;

Je gaigne tout, et demeure perdent;

Au point du jour, dis : «
Dieu vous doint bon soir ! »

Gisant envers, j'ay grant paour de cheoir;

J'ay bien de quoy, et si n'en ay pas un;



Eschoicte attens, et d'homme ne suis hoir;
Bien recueully, débouté de chascun.

De riens n'ay soing, si mectz toute ma paine
D'acquérir biens, et n'y suis prétendant;
Qui mieulx me dit, c'est cil qui plus m'attaine,
Et qui plus vray, lors plus me va bourdent;
Mon ami est qui me fait entendent
D'ung cigne blanc que c'est ung corbeau noir;
Et qui me nuyst croy qu'il m'aide a povoir.
Vérité, bourde, aujourd'uy m'est tout un.
Je retiens tout, riens ne sçay concepvoir;
Bien recueully, débouté de chascun.



ENVOI



Prince clément, or vous plaise savoir

Que j'entends moult, et n'ay sens ne sçavoir;

Parcial suis, a toutes lois commun.

Que sais je plus?
Quoy?
Les gaiges ravoir,

Bien recueully, débouté de chascun.