Requeste a mons. de bourbon - Poéme

Le mien seigneur et prince redoubté,
Fleuron de lys, royalle geniture,
Françoys
Villon, que
Travail a dompté
A coups orbes, par force de bature,
Vous supplie par ceste humble escripture
Que lui faciez quelque gracieux prest.
De s'obliger en toutes cours est prest,
Si ne doubtez que bien ne vous contente :
Sans y avoir dommaige n'interest,
Vous n'y perdez seulement que l'attente.



A prince n'a ung denier emprunté,
Fors a vous seul, vostre humble créature.
De six escus que luy avez preste,
Cela pieça il meist en nourriture.
Tout se paiera ensemble, c'est droiture,
Mais ce sera legierement et prest ;
Car, se du glan rencontre en la forest
D'entour
Patay, et chastaignes ont vente,
Paie serez sans delay ny arrest :
Vous n'y perdrez seulement que l'attente.



Se je peusse vendre de ma santé
A ung
Lombart, usurier par nature,
Faulte d'argent m'a si fort enchanté
Que j'en prendroie, ce cuide, l'adventure.
Argent ne pens a gippon n'a sainture ;
Beau sire
Dieux ! je m'esbaïs que c'est
Que devant moy croix ne se comparoist,
Si non de bois ou pierre, que ne mente ;



Mais s'une fois la vraye m'apparoist,
Vous n'y perdrez seulement que l'attente.



Prince du lys, qui a tout bien complaist,
Que cuidez vous comment il me desplaist.
Quant je ne puis venir a mon entente ?
Bien m'entendez ; aidez moy, s'il yous plaist :
Vous n'y perdrez seulement que l'attente.



Au dos de la lettre

Allez, lettres, faictes ung sault ;
Combien que n'ayez pié ne langue,
Remonstrez en vostre harangue
Que faulte d'argent si m'assault.